23 Augustus 2022
“Die Tembisa-hospitaal het R498 000 betaal vir noupyp denimbroeke, maar steeds is die uitvoerende hoof nié geskors nie.”
Só sê die DA se skadu-LUR vir gesondheid, Jack Bloom nadat News24 berig het dat byna ‘n half-miljoen rand betaal is vir 200 pare denimbroeke vir meisies tussen 6- en 7 jaar oud. Dit is R2500 per paar.
Volgens Bloom is die broeke in Junie verlede jaar gekoop by ‘n maatskappy, Inez Chaste wat ‘n maand ter vore gestig is. Dit is een van tien maatskappye wat besit word deur die afgetrede sokkerspeler, Themba Shabalala en sy vrou, Evelyn.
News24 berig verder dat die egpaar se maatskappye binne ‘n tydperk van twee maande R110-miljoen in kontrakte by die hospitaal losgeslaan het. Die fluitjieblaser, Babita Deokaran, wat vandag een jaar gelede vermoor is, wou glo beweerde korrupsie by die hospitaal blootlê.
Bloom sê ondanks die beweerde korrupsie en denimbroek-skandaal by die hospitaal word die uitvoerende hoof, Ashley Mthunzi nie geskors nie en bly hy steeds in sy pos. “Die hospitaal is berug vir swak dienslewering en oorbevolking, maar het glo baie geld bestee aan luukse leunstoele en denimbroeke.”
Volgens Bloom het die hospitaal ook gedurende die Covid-19-pandemie hand handdoeke aangekoop teen R230 elk.
