20 Oktober 2021
Die bestuurder van ‘n minibus-taxi wat ‘n pa en seun by Bandelierkop in Limpopo in ‘n voorval van padwoede doodgeskiet het, gaan moontlik nie vervolg word nie.
Netwerk24 berig dat die man wat die 52-jarige André Duvenhage en sy 29-jarige seun Danie geskiet het, nog nie aangekla is of in die hof verskyn het nie.
Die man – wie se naam op regsadvies weerhou word – het homself tydens die voorval ook in die been geskiet en is eers vir mediese behandeling in die hospitaal opgeneem.
Brigadier Motlafelo Mojapelo van die polisie het destyds gesê die man sal in die hof verskyn sodra hy ontslaan is.
‘n Woordvoerder van die Nasionale Vervolgingsgesag, Mashudu Malabi-Dzangi, sê die direkteur van openbare vervolging het besluit om nie strafregtelike klagte teen die bestuurder van die minibus-taxi aanhangig te maak nie, maar om eerder ‘n geregtelike doodsondersoek te gelas.
Die Duvenhages is op die 28e Mei doodgeskiet nadat hulle die bestuurder by ‘n vulstasie gekonfronteer het oor ‘n voorval wat glo vroeër op die N1 tussen Pietersburg en Louis Trichardt plaasgevind het.
Stem vir die Aitsa’s
