6 Julie 2022
President Cyril Ramaphosa sê ‘n nasionale debat is nodig om die wettige ouderdom vir alkohol-gebruik van 18 na 21 te verhoog.
Hy het vanoggend ‘n toespraak gelewer by die massabegrafnis van 21 jongmense wat op 26 Junie dood is by ‘n taverne in Scenery Park in die Oos-Kaap. Die tieners, waarvan die jongste 13 was het ‘n partytjie by die Enyobeni taverne gehou om die einde van die eksamen te vier.
Volgens Ramaphosa is daar té veel voorvalle landwyd waar drankmisbruik lei tot verskeie probleme. Hy sê ‘n taverne en ander kuierplekke is nie bedoel vir kinders nie en meen alkohol moes nooit aan hulle bedien word nie.
Hy het ‘n beroep op drankvervaardigers gedoen om nié alkohol aan minderjariges te bemark nie. Volgens hom het hy al verskeie versoeke van mense gehad wat vra dat die ouderdom vir drankverbruik verhoog word na 21.
Ramaphosa sê die dood van die 21 jong mense moet dien as ‘n waarskuwing om die streep te trek rakende die probleem van alkoholmisbruik onder minderjariges. “Ons moet nooit weer toelaat dat so iets gebeur nie.”
