12 September 2023
Die DA se woordvoerder oor gemeenskapsveiligheid in die Wes-Kaap, Gillion Bosman, sê dit is skokkend dat wetstoepassers van ernstige misdade soos moord, verkragting, korrupsie en aanranding aangekla word.
In antwoord op ‘n parlementêre vraag oor dié aangeleentheid het die Suid-Afrikaanse Polisiediens aangedui dat 257 kriminele klagte teen lede van die polisiediens in die Wes-Kaap ingedien is.
Dit is vir die periode van 2020 tot op hede. In 2020 is 100 sake teen polisiebeamptes ingedien, in 2021 was daar 76 sake en 66 sake is in 2022 teen polisiebeamptes ingedien. Tot dusver vanjaar is 15 klagtes teen polisiebeamptes ingedien.
Bosman sê die syfers ondersteun hul standpunt dat polisiëringsmagte na provinsiale vlak afgewentel moet word.
Die kriminele klagtes sluit in:
- 58 klagtes van aanranding
- 17 klagtes van aanranding met die doel om ernstig te beseer
- 43 klagtes van bestuur onder die invloed van drank
- Agt sake van bedrog
- Agt sake van moord
- Vyf sake korrupsie
- Vier sake van verkragting
