24 Januarie 2022
President Cyril Ramaphosa sê die ANC se Nasionale Uitvoerende Komitee (NUK) het ingestem om ‘n taakspan saam te stel om dié party se reaksie op die staatskapingsverslag te bestuur.
Vroeër vandeesmaand het president Ramaphosa die eerste deel van die Zondo-kommissie se verslag ontvang en hy behoort teen die einde van die maand die volgende deel te hê. In deel een van die verslag stel die kommissie se voorsitter, adjunk-hoofregter Raymond Zondo voor dat daar strafregtelik opgetree word teen van die geïmpliseerdes.
LEES OOK: OUTA SÊ WETSTOEPASSERS MOET ONMIDDELLIK OPTREE TEEN DIEGENE WAT UITGEWYS WORD IN ZONDO-VERSLAG
Dit kan ‘n invloed hê op ANC-lede wat in die verslag genoem word.
Die vakbond Cosatu sê om nié teen die mense op te treë nie sal ‘n vermorsing van belastingbetalers se geld wees. President Ramaphosa sê die regering sal eers kommentaar lewer sodra hulle die volledige verslag ontvang het.
Hy hou egter vol dat staatskaping uitgeroei moet word en dat daar wel opgetree word teen skuldige persone.
