11 Julie 2023
Die burgerregteorganisasie AfriForum eis dat ‘n veelsydige taakspan op die been gebring word om die persone wat verantwoordelik is vir die onlangse vragmotorbrande, vas te trek.
Nagenoeg 16 vragmotors is die afgelope drie dae in verskeie dele van die land aan die brand gesteek.
‘n Strategiese raadgewer by AfriForum, Johan Kruger meen dat beide president Cyril Ramaphosa en die minister van polisie, Bheki Cele dringend leierskap moet toon om hierdie vlaag van vragmotorbrande hok te slaan voordat die situasie verder eskaleer.
“Dit is duidelik dat hierdie ’n gekoördineerde poging is deur groepe om sabotasie te pleeg, vragmotorbestuurders te terroriseer en ekonomiese skade aan vervoermaatskappye en die land se ekonomie te doen,” sê Kruger.
Volgens Kruger beskik die polisie ook nie oor die vermoë om vinnig en beslissend op te tree nie.
