29 Junie 2021
Die Kommuniste Party van eSwatini sê Koning Mswati III het na bewering na Johannesburg gevlug, nadat daar verlede week onluste in Swaziland of eSwatini uitgebreek het.
Die pro-demokrasie betogings woed al vir etlike dae, en het gister krisisafmetings bereik, nadat daar winkels aan die brand gesteek is, en betogers glo deur die weermag doodgeskiet en beseer is.
Daar word bespiegel dat hy tans in Suid-Afrika is nadat die Kommuniste Party gesê het dat Koning Mswati “al gister uit die land gevlug het, en skuil hy tans in die Sandton-omgewing in Johannesburg.”
Inwoners betoog teen die outokratiese monargie, en eis onder meer dat hulle die eerste minister van die land moet kan verkies.
Die woordvoerder van Swaziland se Solidariteit Netwerk (SSN), Lucky Lukhele sê gisteraand was een van die slegste aande in die land se geskiedenis.
Volgens hom is die Swaziland brouery aan die brand gesteek waarna die weermag na bewering op betogers losgebrand het.
