9 Januarie 2024
Waarskuwing: Die berig kan sensitiewe lesers ontstel.
Die Suid-Koreaanse regering het ‘n verbod geplaas op die teel, slag en verkoop van honde en hondevleis vir menslike gebruik.
Diere-organisasies wat geveg het vir ‘n einde aan die hondevleisbedryf, het dit beskryf as ‘n geskiedkundige beslissing. Dit sal luidens die verbod vanaf 2027 onwettig wees om hondevleis te verkoop.
Dit sal egter met onmidellike ingang onwettig wees om nuwe hondeplase, slaghuise, verwerkingsfasiliteite en restaurante vir hondevleis aan te bou.
Mense wat nié die wet gehoorsaam nie kan tot drie jaar gevangenisstraf gevonnis word of ‘n boete van £18,000 of sowat R400 000 opgelewer word. Daar word luidens die verbod egter nie melding gemaak van die eet van hondevleis nie, net dat die bedryf nie mag voortgaan nie.
Boere van hondeplase het aangedui dat hulle die beslissing sal teenstaan.
Volgens Suid-Korea se departement van landbou het nagenoeg 1 100 hondeplase in 2022 meer as 570 000 honde geteel en geslag om in 1 600 restaurante bedien te word.
Foto: SkyNews
