19 Junie 2024
President Cyril Ramaphosa sê dit is die begin van ‘n nuwe era vir Suid-Afrika na afloop van die verkiesing.
Hy is vanoggend tydens ‘n amptelike seremonie by die Uniegebou deur hoofregter Raymond Zondo ingehuldig vir sy tweede termyn as president.
Ramaphosa sê die regering aanvaar en respekteer die uitkomste van verlede maand se nasionale verkiesing. Volgens hom is dit duidelik dat landsburgers nie op een party kon besluit nie, en sal daarom gehoor gee aan Suid-Afrikaners se wense deur die stig van ‘n Regering van Nasionale Eenheid,
Hy sê dit is duidelik deur die uitslae van die verkiesing dat mense ‘n meer inklusiewe land soek met gelyke geleenthede vir al sy inwoners ongeag hulle ras of geslag. Volgens hom was mense baie eerlik oor dit wat hulle soek.
“Hulle soek ‘n land waarin hulle ‘n skuiling kan vind in ‘n demokratiese Grondwet, met gewaarborgde beskerming van die howe.” Ramaphosa sê Suid-Afrikaners sienuit na ‘n land waar hulle bo hulle omstandighede kan uitstyg.
“Suid-Afrikaners soek goeie huise, kos, en basiese dienste soos paaie wat onderhou word, en straatligte wat werk. Hulle soek grond omdat hulle wil boer, en hulle wil besighede kan bedryf. Hulle wil veilig in hulle huise, op straat, in stede, dorpe en plase wees.”
Hy sê Suid-Afrikaners moet alles in hulle vermoë doen om die drome ‘n werklikheid te maak.
