11 Augustus 2023
Die besluit om oud-president Jacob Zuma van sy vonnis kwyt te skeld, het verskeie reaksie in opposisiepartye ontlok.
ActionSA meen die besluit skep ‘n gevaarlike presedent dat onwettige optrede nie gevolge het nie. Die party meen dit toon ‘n minagting vir die regstelsel. Die leier van die party, Herman Mashaba sê dit wil voorkom asof president Cyril Ramaphosa 9 488 gevangenes vrygelaat het om Zuma te red van verdere gevangenisstraf.
Die DA het vroeër ook op die nuus gereageer en meen dat dit ‘n bewys is dat die ANC uit die kussings in aanstaande jaar se algemene verkiesing gelig behoort te word. Die leier van die party het tydens ‘n mediakonferensie gesê dat die party verdere regstappe oor die kwytskelding oorweeg.
Die DA-LP, advokaat Glynnis Breytenbach sê hierdie kwytskelding is ‘n skande, en Suid-Afrikaners behoort woedend te wees.
Die leier van die VF Plus, dr Pieter Groenewald sê die besluit is ‘n teken van Ramaphosa se oneerlikheid oor die aangeleentheid aangesien hy twee jaar gelede ʼn direkte vraag van die VF Plus oor die moontlikheid van kwytskelding ontduik het.
Hy meen die ANC sal op gewone landsburgers trap, en nie hulle regte respekteer nie, bloot om ‘n kader uit die tronk te hou.
Die IVP het die kwytskelding verwelkom, en meen die besluit verhoed enige verdere onluste. Die party het egter benadruk dat die kwytskelding nie as ‘n presedent beskou moet word nie.
