30 Junie 2022
Die Suid-Afrikaanse Reserwebank (SARB) is vandag – 101 jaar gelede – op 30 Junie 1921 gestig.
Die ongewone finansiële en monetêre toestande weens die Eerste Wêreldoorlog tussen 1914 en 1918 het die behoefte vir ‘n sentrale bank genoodsaak.
Die Reserwebank vertel op sy webblad dat op daardie stadium was die geld-eenheid gekoppel aan ‘n goudstandaard en moes die bank ‘n goudreserwe bewaar om die waarde van die uitgereikte geld te waarborg.
“Maar toe die prys van goud in die Verenigde Koninkryk gestyg het, kon ‘n wins gemaak word deur banknote in goud in Suid-Afrika om te skakel en die goud in Londen te verkoop. Om hul finansiële lewensvatbaarheid te verseker, het die banke die regering versoek om hulle vry te stel van die verpligting om hul banknote op aanvraag in goud om te skakel.”
Na die Goudkonferensie van 1919 het ‘n parlementêre komitee voorgestel dat ‘n sentrale bank gestig word om kommersiële banke se goud te berg en om banknote uit te reik.
Op 30 Junie 1921 open die Reserwebank sy deure en reik op 19 April 1922 die eerste banknote uit.
