13 Augustus 2024
Suid-Afrika se deelnemers aan die pasafgelope Olimpiese Spele in Parys, Frankryk het vanoggend by die OR Tambo Internasionale Lughawe in Johannesburg aangekom, waar hulle met ‘n helde-ontvangs verwelkom is.
Suid-Afrika kon ses medaljes in vanjaar se spele wen, drie meer as die vorige Olimpiese Spele in Japan.
Die swemmer Tatjana Smith het ‘n goue medalje gekry in die 100 meter borsslag, en silwer in die 200 meter borsslag.
Die 26-jarige spiesgooier, Jo-Ané van Dyk het ‘n silwer medalje gekry, terwyl die 4 x 100 meter-aflosspan, die derde silwer medalje huis toe gebring het.
Die bergfietsryer, Alan Hatherly en die Mans se Sewes rugbyspan het elk ‘n brons medalje gekry.
Die minister van sport, kuns en kultuur, Gayton McKenzie was vanoggend by die lughawe om span Suid-Afrika terug te verwelkom.
Hy het benadruk dat sy departement meer sal doen om deelnemers in alle sportsoorte te ondersteun.
McKenzie het aan die media gesê dat hulle nie van byvoorbeeld die hokkiespan kan verwag om te presteer as die spanlede elke dag moet aanmeld vir ‘n gewone werk nie.
Hokkie is een van die sportsoorte wat nie professioneel in Suid-Afrika is nie. Die minister het ook gesê dat die atlete se prestasies nie maklik was nie, en het hulle geluk gewens.
Hy het na die skare verwys, en meen mense van alle rasse was daar om die span terug te verwelkom.
“Hierdie is Suid-Afrika, jy kan sien hier is mense van alle rasse, ons moenie toelaat dat die wêreld ons verdeel nie.”
Volgens hom het hy met die onderskeie LUR’e in die nege provinsies vergader, en meen daar sal binnekort ‘n groot verandering binne sport in Suid-Afrika plaasvind.
Hy reken Suid-Afrikaanse sportsterre is gereed om goed te presteer, maar dat hulle die ondersteuning nodig het.
Smith het tydens ‘n mediakonferensie gesê dat sy oorweldig is deur vanoggend se verwelkoming.
Sy het emosioneel geraak toe sy sê dat vandag waarskynlik een van die laaste kere is wat sy groen en goud gaan dra omdat dié Olimpiese Spele haar laaste spele was.
Volgens Smith sal sy nou daarop fokus om jong atlete leiding te gee. Sy het beaam dat meer gedoen moet word om atlete in Suid-Afrika by te staan.
Smith het verder jongmense aangemoedig om hulle drome na te jaag en slegs daarna te streef om hulleself te wees. Sy sê as “‘n meisie van Roodepoort” ‘n medalje kan verower kan jy dit ook doen.
