27 September 2023
“Suid-Afrika is steeds die ‘betogingshoofstad’ van die wêreld, met meer as 13 500 betogings wat jaarliks in die land plaasvind.”
Dit volgens die leier van die Anti-Privatisation Forum, dr Trevor Ngwane. Hy meen inwoners van armer gemeenskappe word soms genoodsaak om te betoog omdat die regering hulle in die steek gelaat het, en dat dit soms die enigste uitweg is om seker te maak dat hulle gehoor word.
Mense betoog dikwels oor diensleweringskwessies soos water en elektrisiteit asook salarisverhogings.
Volgens Ngwane word ryk en middelklas Suid-Afrikaners deur die regering se kapitalistiese-model bevoordeel, terwyl die minderbevoorregte mense is wat die swaarste trek.
Hy het egter benadruk dat betogings nie die land se probleme sal oplos nie, en dat daar ander drastiese stappe gedoen moet word. Volgens hom moet die regering nie alleenlik verantwoordelik wees nie, en moet ander organisasies en maatskappye die regering ondersteun om minderbevoorregte mense by te staan.
