30 Julie 2022
Statistiek Suid-Afrika (SSA) se jongste verslag oor bevolkingskattings dui aan dat meer as 43 500 wit Suid-Afrikaners tussen 2021 en 2026 die land gaan verlaat of reeds verlaat het.
SSA se statistikus-generaal, Risenga Maluleke het vroeër vandeesweek die organisasie se halfjaarbevolkingskatting bekend gemaak.
Volgens die data is die wit bevolking in Suid-Afrika se getalle ook besig om te daal. Daar is tans 23 191 minder wit mense in die land as ‘n jaar gelede. In dieselfde tydperk het die swart bevolking met meer as 430 480 mense toegeneem. Die bruin gemeenskap het toegeneem met 44 951 terwyl die Indiese/ Asiese bevolking met 9 774 gegroei het.
Die verslag toon verder dat tot en met 2026 sal Gauteng en die Wes-Kaap die grootste hoeveelheid migrante verwelkom met onderskeidelik meer as 1,4-miljoen en 460 000 mense.
Die totale bevolking het tussen Januarie 2021 en Junie 2022 met nagenoeg 640 070 mense toegeneem tot 60,6-miljoen.
