Die DA het die Suider-Afrikaanse Ontwikkelingsgemeenskap (SAOG) se besluit, om troepe uit die Demokratiese Republiek die Kongo (DRK) te onttrek, verwelkom.
Die DA se woordvoerder oor Verdediging en Militêre veterane, Chris Hattingh sê gegewe die haglike toestande waarin die troepe in die DRK diens moes doen en die sterftes, is dit verblydend dat hulle onttrek is.
Hy sê die party vra reeds ‘n geruime tyd dat die troepe onttrek word, veral na die gevegte tussen 23 en 25 Januarie toe die M23-rebelle die troepe omsingel het. Volgens hom het die soldate reeds die afgelope 48 dae geen ondersteuning ontvang van die regering en weermag nie.
Hattingh sê die troepe is ontneem van kos, en mediese voorraad.
Hy sê hoewel die besluit verwelkom word, gaan dit logistiek uitdagend wees om die soldate te onttrek. “Ons doen ‘n beroep op die minister van verdediging Angie Motshekga om seker te maak dat geen wapens of ammunisie agterbly nie omdat dit in die hande kan land van die M23-rebelle groep.”
