15 Mei 2023
Dit sal ‘n oorlogsverklaring wees indien die Russiese president, Wladimir Poetin, in hegtenis geneem word tydens vanjaar se BRICS-beraad wat in Durban plaasvind.
Dít is die waarskuwing wat Rusland se voorste politieke party aan die ANC gerig het.
Die adjunkminister van openbare ondernemings, Obed Bapela, wat onlangs Rusland besoek het, het dié waarskuwing bevestig.
Die Suid-Afrikaanse regering het al die BRICS-leiers genooi om vanjaar se beraad in Augustus by te woon. President Cyril Ramaphosa het ook dié uitnodiging aan Poetin gerig.
Die Internasionale Strafhof, die IS, het egter kort ná die uitnodiging ‘n lasbrief vir Poetin se inhegtenisneming uitgereik vir beweerde oorlogmisdade wat in Oekraïne gepleeg is.
As lid van die IS, het Suid-Afrika ‘n wetlike plig om arrestasiebevele van die IS uit te voer. Die Wes-Kaap se premier, Alan Winde het na die uitnodiging aan Poetin gesê dat hy seker sal maak dat Poetin in hegtenis geneem word indien “hy sy voete in dié provinsie sit.”
Foto: The Moscow Times
