19 Mei 2023
Die minister in die presidensie belas met die Staatsveiligheidsagentskap, Khumbudzo Ntshavheni, sê Suid-Afrika het nié ‘n anti-Amerika-houding nie.
Volgens haar word daar ‘n vals indruk geskep oor die verhouding tussen Amerika en Suid-Afrika nadat die Amerikaanse ambassadeur, Reuben Brigety beweer het dat Suid-Afrika wapens aan Rusland verskaf het.
Ntshavheni sê die land se verhouding met Amerika word hoog op die prys gestel omdat Amerika Suid-Afrika se grootste handelsvennoot is.
Sy het vandag in die parlement gesê dat Suid-Afrika samewerkingsooreenkomste met Amerika het in gebiede soos intelligensie, opleiding, kuberveiligheid en teenterrorisme.
Volgens haar sal die regering aanhou om ondersteuning te bied totdat ‘n einde gebring word aan die oorlogsituasie tussen Rusland en die Oekraïne.
