27 Februarie 2024
Die Nasionale Tesourie werk glo daaraan om Suid-Afrika teen volgende jaar van die sogenaamde gryslys te verwyder.
Die Financial Action Task Force – ‘n wêreldwye finansiële waghond – het die land ‘n jaar gelede op ‘n gryslys geplaas.
Dit was weens die versuim van die Suid-Afrikaanse regering om internasionale standaarde en regulasies met betrekking tot geldwassery en terreurfinansiering af te dwing.
Die tesourie sê hy het aansienlike vordering gemaak met die bou van ‘n finansiële stelsel wat minder kwesbaar vir misbruik en onwettige finansiële aktiwiteite is.
Dit is in die 2024-oorsigdokumente vir die finansiële sektor na verlede week se begroting aan die lig gebring.
Die tesourie is vol vertroue dat Suid-Afrika teen Februarie volgende jaar nie meer op die gryslys sal wees nie.
