28 Junie 2024
Die Finansiële Aksietaakmag, die FATF sê Suid-Afrika het steeds nie genoeg gedoen om van die gryslys verwyder te word nie.
Suid-Afrika is verlede jaar op die lys van lande geplaas wat nie genoeg doen om geldwassery en die finansiering van terreur te voorkom nie.
Die FATF het na ‘n drie dae lange vergadering in Singapoer toegegee dat Suid-Afrika reeds baie gedoen het om te verseker dat hulle van die lys verwyder word, maar meen daar moet steeds aan baie voorwaardes voldoen word.
Volgens die FATF glo hulle dat Suid-Afrika moontlik teen middel 2025 van die lys verwyder kan word mits hulle aan ‘n paar sleutelpunte kan voldoen.
Die FATF meen die regering moet onder meer bewys dat hy belangrike inligting aan internasionale vennote kan deel. Suid-Afrika moet ook verseker dat die polisie en Valke toegang tot inligting het wat betref wie sekere maatskappy in die land besit.
