6 Junie 2022
President Cyril Ramaphosa sê die brandstofheffing-verligting, wat die regering ingestel het kan nie verewig verleng word nie.
Hy het in sy weeklikse nuusbrief geskryf oor die duur lewenskostes en het toegegee dat Suid-Afrikaners die afgelope paar maande gebuk gaan onder duurder kospryse en ander noodsaaklikhede.
Volgens hom is dit nie volhoubaar om die verligting vir motoriste te verleng nie omdat dié geld, wat verlore gaan weens die verligting, op ander plekke aangewend moet word.
Ramaphosa sê die regering het nie beheer op internasionale kwessies wat die brandstofprys bepaal nie, maar hou vol dat daar wel maniere is om dit teen te werk.
Hy sê een van die maniere om die hoër brandstofprys teen te werk is met verhoogde landbou-uitvoere, om kospryse in Suid-Afrika te stabiliseer.
Die brandstofheffingverligting is verlede week tot Augustus verleng. Sou dit nie hiervoor wees nie kon die brandstofprys in Junie veel hoër wees.
