29 April 2024
Die minister van verdediging en militêre veterane, Thandi Modise, sê maatreëls is ingestel om stemlokale tydens die nasionale en provinsiale verkiesings in Mei te beskerm.
Dít volg nadat die interdepartementele groep belas met justisie, misdaadvoorkoming en veiligheid die afgelope naweek terugvoer oor die gereedheidsvlak wat sekuriteit tydens die verkiesing betref, gegee het.
Volgens Modise strek die maatreëls ook tot nasionale sleutelpunte en ander fasiliteite wat kwesbaar vir kriminele aktiwiteite is.
Sy het verseker dat alle kiesers veilig sal wees wanneer hulle stem.
Modise sê die howe is ook voorbereid en gereed om alle verkiesingsverwante misdade te hanteer.
Aanklaers sal glo op bystand wees om oortredings soos verkiesingsbedrog en korrupsie, die verwydering of skending van politieke partye en veldtogplakkate, inmenging met die pligte van die kiesbeamptes of om enigiemand te dwing om te stem waar hulle nie wil nie, te vervolg.
