23 Junie 2023
ActionSA sê hy is bekommerd oor die onlangse sluiting van al die strande in Umhlanga – aan die KwaZulu-Natalse Noordkus – op die vooraand van die skoolvakansie.
Volgens dié party benadeel dit nie net toerisme in Umhlanga nie, maar ook in die groter-eThekwini. Die strande in Umhlanga is onbepaald gesluit weens onverwerkte riool wat in die see inloop.
ActionSA sê toerisme in Durban is op die agtervoet, en strandsluitings voor skoolvakansies is uiters kommerwekkend, veral vir diegene wat afhanklik is van ‘n toestroming van toeriste gedurende hierdie tye om ‘n bestaan te maak.
Verlede Desember is twee-en-twintig-persent minder toeriste – weens dieselfde oorsake – in dié gebied verwelkom en die party sê daar is min twyfel dat toeristegetalle in hierdie Junie/Julie-skoolvakansie soortgelyk – of selfs minder – sal wees.
