1 Julie 2021
Die minister van vervoer, Fikile Mbalula het bevestig dat die strafpuntestelsel – wat deel vorm van die omstrede AARTO wetgewing – nie vandag in werking tree, soos wat oorspronklik die plan was nie.
Mbalula sê die Wet op die Administratiewe Beregtiging van Padverkeersmisdrywe sal eerder stapsgewys in werking tree om lede van die publiek beter daarop voor te berei.
‘n Gedeelte van die AARTO-wetgewing het dit ten doel om bestuurders en vloot-operateurs met ‘n puntestelsel te straf – wat uiteindelik kan lei tot die opskorting of kansellasie van die lisensie.
Insgelyks sal bestuurders vergoed word vir goeie bestuursgedrag deur punte by te kry.
Burgerregteorganisasies en ander belanghebbendes het hulle kommer en frustrasie uitgespreek oor die gebrek aan duidelikheid wat met die inwerkingstelling van die wetgewing gepaard gaan.
