24 Junie 2024
AfriForum se privaatvervolgingseenheid is deur ‘n familie gekontak om ondersoek in te stel ná die Suid-Afrikaanse Polisiediens (SAPD) se beweerde versuim om ’n forensiese ondersoek in ’n saak van strafbare manslag te voltooi.
Dit kom byna twee jaar nadat Danielle van Jaarsveld in ‘n motorongeluk in Sedgefield oorlede is. Die verdagte in die saak, Gareth Webster word daarvan beskuldig dat hy na bewering op 6 November 2022 teen ’n hoë spoed gery het toe sy Audi SQ5 met Van Jaarsveld se Kia gebots het.
Hy en ‘n passasier het ‘n gholfdag bygewoon toe die ongeluk gebeur het.
Volgens die eenheid se woordvoerder, Barry Bateman het hulle reeds ‘n skrywe aan die Nasionale Vervolgingsgesag (NVG) gerig om hul kommer uit te spreek oor die saak wat sloer.
Volgens hom was Van Jaarsveld en haar skoonsuster, Monique van Zyl op pad strand toe ten tyde van die ongeluk. Van Jaarsveld is onderweg na die hospitaal oorlede en Van Zyl het ernstige beserings opgedoen.
Webster het op 3 Oktober 2023 vir die eerste keer op ’n klag van strafbare manslag in die hof verskyn. Die saak is egter op 13 Maart voorlopig teruggetrek ná dit talle kere uitgestel is aangesien die SAPD nie ’n forensiese verslag kon voltooi nie.
“Van Jaarsveld se familie is ook ingelig dat die ooggetuie verklarings en die beeldmateriaal van die ongeluk nie in die dossier ingesluit was nie. Die saak is nog nie weer op die rol geplaas nie.” Volgens Bateman is daar genoegsame bewyse is om Webster te vervolg.
