31 Augustus 2022
Die Jacob Zuma-stigting sê hulle sal die Hooggeregshof in Pietermaritzburg se uitspraak bestudeer, nadat die VBS Mutual Bank se kurators gister ‘n beslagleggingsbevel gekry het.
Dié bevel beteken dat oud-president Zuma dalk eersdaags sy beeste, motors en meubels kwyt kan wees om ‘n lening van R6,5-miljoen terug te betaal. Hy het agter geraak met die terugbetalingspaaiemente.
Zuma moes destyds inderhaas etlike miljoen-rand leen nadat die Openbare Beskermer, Thuli Madonsela, bevind het dat die swembad en hoenderhokke by sy woning op Nkandla nie as veiligheidsopgraderings kwalifiseer wat deur die belastingbetaler gedra kan word nie.
Die stigting het op Twitter gesê dat hulle ‘n verklaring sal uitreik sodra hulle die bevel bestudeer het.
