2 November 2021
Die leier van die DA, John Steenhuisen, wil hê dat ‘n ondersoek gelas moet word na foutiewe kiesersbestuurstoestelle wat tydens die plaaslike regeringsverkiesing gebruik is.
Steenhuisen is van mening dat baie Suid-Afrikaners hierdeur van hulle stemreg ontneem is.
Sy uitsprake kom op dieselfde dag wat die VF Plus se Wouter Wessels beweer het dat tot soveel as 70 000 kiesers hierdeur geraak is, terwyl die OVK meen dat dit nie veel meer as 6000 kiesers beïnvloed het nie.
Wessels is ook van mening dat die kwessie moontlik in die kieshof sal kan draai, afhangende van die uitslag van sekere munisipale rade.
Die OVK se nasionale senior bestuurder van verkiesingsbedrywighede, Granville Abrahams, het gesê die aangeleentheid het die nodige aandag gekry en kieses wat hierdeur geraak is, is per SMS gekontak en meegedeel dat die saak opgelos is en hulle na dieselfde stemlokale kan terugkeer.
Steenhuisen glo egter dat ‘n onafhanklike ondersoek na die OVK – as ‘n Hoofstuk 9-instelling – nodig is om sy foute op stemdag – en sy optrede in aanloop tot die verkiesing – te belig.
Stem vir die Aitsa’s
