28 Oktober 2022
‘n Staking word verwag nadat loononderhandelinge by Massmart en sy Makro-winkels weereens ‘n dooie punt bereik het.
Die kommissie vir versoening, bemiddeling en arbitrasie hanteer die onderhandelinge van die afgelope paar maande, maar volgens berigte kon daar nie tot ‘n vergelyk gekom word nie.
Die vakbond, Saccawu eis ‘n verhoging van 12% vir die werknemers van Makro se 22 landswye winkels. Massmart bied egter net 4,5% aan. Volgens Saccawu is 85% van Makro-werknemers lede van die vakbond, en het hulle reeds Woensdag met stakings by van die winkels begin.
Verder eis die vakbond ook ‘n minimum loonverhoging van R8 000 per maand, verhoging in kommissie van 10% na 20%, 13de salaris vir alle werknemers en ‘n uniform toelaag van R100.
Die loononderhandelinge hervat môreoggend, maar Saccawu sê hy sal aanhou met sy staking indien daar nie aan sy eise voldoen word nie.
Massmart het in reaksie gesê dat die vakbond se eise onrealisties is. Die maatskappy sê dat hulle planne in plek het om te verseker dat bedrywighede by Makro voortgaan.
