15 Junie 2021
Nuwe regulasies wat deur die departement van arbeid en indiensneming in die Staatskoerant gepubliseer is, verplig werkgewers om betaalde verlof toe te staan vir werknemers wat hulle teen Covid-19 wil laat inent.
Deel van die nuwe regulasies laat ook toe dat ‘n werknemer siekverlof mag neem as hy of sy enige newe-effekte van die inenting toon – sonder dat ‘n bykomende siektesertifikaat deur ‘n geneesheer uitgereik hoef te word.
Werkgewers word ook verplig om – met insette van vakbonde en veiligheidkomitees – ‘n risikobepaling te doen hoe om die oordrag van die virus in die werksplek te beperk.
Die regulasies bevat ook omvattende voorskrifte oor optrede deur die werkgewer tydens ‘n uitbreking by die werksplek, asook sosiale afstand wat by die werksplek gahandhaaf moet word en die nagaan van werknemers vir enige bekende simptome.
Die nuwe regulasies, wat deur minister Thulas Nxesi onderteken is, fokus meestal op die hantering van arbeidsverhoudinge tydens die inentingsprogram en bevat ook riglyne wat in ag geneem moet word indien ‘n betrokke werkgewer ‘n verpligte inentingsbeleid in werking wil stel.
