2 Desember 2021
Die Covid-19-pandemie het volgens Statistiek Suid-Afrika (SSA) ook ‘n uitwerking op peuters, kleuters, dagsorgsentrums en kleuterskole gehad.
Luidens SSA se Algemene Huishoudelike-Opname, wat vandag vrygestel is het die pandemie kleutersorg verander. Kinders tussen 0 en 4 jaar oud, wat in dagsorsentrums of kleuterskole skoolgaan het van 36,8% in 2019 gedaal na 24,2% in 2020.
Kinders in dié ouderdomsgroep, wat deur ‘n ouer of voog by die huis versorg word (eerder as om skool toe te gaan) het gestyg van 57,8% in 2019 na 67,2% in 2020. Volgens SSA het skole en ander dagsorgsentrums wel verlede jaar met tye gesluit weens die pandemie, maar talle kinders is steeds nie skool toe geneem nie, al was skole oop.
In 2019 het 10,9% van 5-jariges nié skoolgegaan nie. Dié syfer het verlede jaar na 37,7% gestyg. Daarteenoor het 11,8% van 6-jariges (kinders in Graad R of Graad 0) nie in 2020 skool toe gegaan nie, in vergelyking met 2019 se 3,5%.
