14 September 2023
AfriForum Jeug het die nuus verwelkom dat die EFF kandidate vir die studenteraad (SR) van die Universiteit van Pretoria (UP) geskors is.
Dit volg nadat dit vroeër vanoggend aangekondig is dat al agt verkose studenteraadskandidate van die EFF Student Command (EFFSC) UP gediskwalifiseer is weens hul oortreding van studenteraadsverkiesingsreëls.
AfriForum Jeug sê dié besluit is geneem deur die universiteit se onafhanklike verkiesingsmoniteringspaneel (IMB).
LEES OOK: EFF WIL UNIVERSITEIT TOT STILSTAND DWING OOR SR-VERKIESING
AfriForum Jeug het verlede week in ’n brief aan die universiteit se leierskap geëis dat die EFFSC UP as ’n studentevereniging gederegistreer word en dat hul studenteraadskandidate (SR) geskors word. Die organisasie se woordvoerder, René van der Vyver sê hul het ook ‘n klag teen die voorlopige SR-verkiesingsuitslae ingedien.
“Die EFFSC UP het hulself skuldig gemaak aan intimidasie, aanhitsing tot geweld, die ontwrigting van studiesessies en die aanvuring van rassespanning.” Van der Vyver meen ‘n SR wat liedjies oor moord sing, studies ontwrig of studente intimideer kan nooit as leiers erken word nie.
“Die universiteit het ’n verantwoordelikheid om studente te beskerm en diegene wat ontwrigting veroorsaak, te keer. Studente wat onveilig voel, kan AfriForum Jeug in kennis stel van enige intimidasie of geweld,” sluit Van der Vyver af.
Foto: Skills Portal
