12 September 2023
Die hoof van die Spesiale Ondersoekeenheid, Andy Mothibi, sê ondanks moontlike goeie bedoelings het die voormalige uitvoerende hoof van Eskom, André de Ruyter, homself aan wanadministrasie skuldig gemaak deur ‘n geheime ondersoek na die bedrywighede van die kragvoorsiener te magtig.
Mothibi het aan die Parlement gesê De Ruyter moet steeds aanspreeklik gehou word vir sy optrede wat nie met sy amp strook nie.
Die Parlement se Staande Komitee oor Openbare Rekeninge, Skoor, het vanoggend voortgegaan met sy ondersoek na die korrupsiebewerings wat deur De Ruyter gemaak is – eers in ‘n televisie-onderhoud op eNCA, en later in ‘n boek.
Die SOE het vasgestel dat die kontrak vir die geheime ondersoek na Eskom tussen Business Leadership South Africa en George Fivaz Forensic and Risk aangegaan is.
Mothibi het bevestig dat De Ruyter die direksie oor dié ondersoek in die duister gehou het.
