21 September 2022
Solidariteit het vandag ʼn beroep op die Suid-Afrikaanse Reserwebank gedoen om oordeelkundig op te tree wanneer die sentrale bank more sy jongste bepaling van die rentekoers bekendmaak.
‘n Ekonomiese navorser by die Solidariteit Navorsingsinstituut, Theuns du Buisson sê hoewel inflasie teen ʼn koers van 7,6% steeds buite die Reserwebank se teikenband van 3 tot 6% is, is dit geen rede vir skerp rentekoersstygings nie.
Hy sê ‘n hoër rentekoers sal die verbruiker onder nóg groter druk plaas en sal enige kans op ekonomiese groei in Suid-Afrika kniehalter.
Volgens Du Buisson het die ekonomie reeds in die vorige kwartaal gekrimp en met voortdurende beurtkrag is dit amper ʼn gegewe dat ekonomiese groei in hierdie kwartaal ook onwaarskynlik sal wees.
Hy is van mening dat die Reserwebank nie kan bekostig om nog kapitaal uit die reeds sukkelende mark te onttrek nie.
