4 Augustus 2022
Solidariteit het vandag sy lys van vaardige kragkenners aan die minister van openbare ondernemings, Pravin Gordhan, en André de Ruyter, bestuurshoof van Eskom, gestuur.
Dit volg nadat minister Gordhan onlangs vir Solidariteit versoek het om só ʼn lys op te stel ten einde die krisis by Eskom aan te pak.
Volgens Solidariteit is daar ongeveer 300 name van kenners op die lys, met sowat 5 500 jaar se gesamentlike ervaring in die bedryf, en hulle beskik ook oor meer as 400 geakkrediteerde kwalifikasies waarvan 14 doktorsgrade in ingenieurswese en verwante velde is.
Solidariteit se bestuurshoof, dr. Dirk Hermann sê hierdie lys bevat van die land se voorste kenners op die gebied van krag.
Hy sê die grootste knelpunt in die kragnetwerk lê tans by opwekking en daarom is die grootste persentasie van die kundiges (70%) op die lys by opwekking betrokke.
“Die huidige krisis by Eskom waaronder alle Suid-Afrikaners ly en wat ons ganse ekonomie bedreig, is té groot vir ʼn enkele party, insluitend die staat, om dit alleen op te los. ʼn Funksionerende Eskom is van kardinale belang, vir sowel die organisasie se werknemers as werknemers regdeur die Suid-Afrikaanse ekonomie.”
