9 Maart 2022
Die vakbond, Solidariteit het vandag lasbriewe van eksekusie ter waarde van sowat R90-miljoen by die balju ingedien nadat Denel versuim het om salarisse van dié waarde – ingevolge ʼn hofbevel – aan Solidariteit se lede oor te betaal.
Solidariteit voer aan dat – ondanks finansiële druk – Denel nie bloot net kan terugval op ʼn verweer dat daar nie geld is nie.
LEES OOK: DENEL MOET AGTERSTALLIGE SALARISSE AAN WERKNEMERS BETAAL, BESLIS HOF
Volgens die vakbond moet beskikbare fondse gemobiliseer en geprioritiseer word indien Denel nie van doelbewuste verontagsaming van ʼn hofbevel beskuldig wil word nie.
Die vakbond se sektorkoördineerder van verdediging en lugvaart, Derek Mans, sê dit wat Denel tans doen, kom deur die bank neer op ʼn totale versuim van pligte.
Hy sê besluitneming is stadig en swak, implementering vind bykans nooit plaas nie en daar waar besluite geneem word en mense dit wil implementeer, word die nodige geld nie beskikbaar gestel nie.
LEES OOK: BALJU SKRYF DENEL SE BATES OP
Solidariteit wys daarop dat sommige van die werknemers vir meer as twee jaar moes klaarkom met gedeeltelike of geen salarisuitbetalings van Denel nie.
“Dit is onaanvaarbaar dat gewone werkers met hul lewensbestaan moet inboet bloot as gevolg van die onbeholpenheid en onbevoegdheid van hierdie maatskappy se topbestuur. Dit is ondraaglik en moet teëgestaan word. As Denel nie wil betaal nie, dan lê ons beslag op sy bates. Denel het immers reeds hopeloos te veel van ons lede weggeneem,” sluit Mans af.
