30 November 2021
Die vakbond, Solidariteit het sy teenkanting teen die jongste brandstofprysheffings uitgespreek en die onvolhoubaarheid daarvan beklemtoon.
Dit volg nadat ’n verdere skerp styging in brandstofpryse gister aangekondig is. Dié nuwe brandstofprys tree om middernag vanaand in werking. Die prys van petrol styg met 81-sent per liter, diesel sal tussen 72-sent en 74-sent per liter verhoog afhangend van die swaelinhoud en paraffien sal 42-sent per liter meer kos.
LEES OOK: BRANDSTOFPRYS STYG WEER SKERP
Volgens Solidariteit sal dié nuutste brandstofheffing tesame met nuwe reisbeperkings teen Suid-Afrika wat die toerismebedryf lamlê, en algemene slegte ekonomiese toestande, dalk die laaste strooi wees wat die kameel se rug breek. Solidariteit is van mening dat verbruikers eenvoudig net nie meer sal kan byhou nie.
“Dit is tyd dat die verbruiker, die gewone landsburger, eerste kom by ons regering. Mense moet werk toe kan gaan en kos kan gaan koop. Stygende brandstofpryse maak die verbruiker al hoe armer. Die regering moet sy pryskomplot tussen homself en die brandstofhandelaars laat vaar,” sê Theuns du Buisson, ekonomiese navorser by Solidariteit.
Du Buisson het benadruk dat Solidariteit sal voortgaan om vir die deregulering van alle vorme van brandstof, spesifiek petrol, te veg.
Stem vir die Aitsa’s
