18 Oktober 2021
Die vakbond, Solidariteit het bevestig dat hy ingevolge die Wet op die Bevordering van Toegang tot Inligting (PAIA) ʼn aansoek loods in verband met die opmerkings van die waarnemende direkteur-generaal van die departement van gesondheid, dr. Nicolas Crisp nadat hy vroeër gesê het dat die Nasionale Gesondheidsversekering (NGV) teen die einde van die jaar in werking sal tree.
LEES OOK: NGV GELUKBRINGER KOS DEPARTEMENT GLO R1,1-MILJOEN
Solidariteit het na aanleiding van die kommentaar ʼn regskrywe in September vanjaar aan dr. Crisp gerig, maar hy het nie daarop gereageer nie. Volgens Solidariteit is die organisasie dus genoodsaak om strenger stappe te doen omdat dit reuse-onsekerheid by sy lede in die gesondheidsektor en elders veroorsaak.
“Dit is uiters onverantwoordelik van ʼn staatsamptenaar om sulke uitlatings te maak terwyl ons nog midde-in ʼn openbare deelnameproses is. Dit dui daarop dat die regering hierdie prosesse minag en bloot probeer om hierdie beleide deur te stoomroller,” sê Connie Mulder, hoof van die Solidariteit Navorsingsinstituut (SNI).
Mulder meen boonop is daar ook geen inligting met betrekking tot wat hierdie implementering van die NGV beteken nie.
LEES OOK: SOLIDARITEIT KLA SA BY VERENIGDE NASIES AAN OOR “RASMALHEID”
“Die NGV sal Suid-Afrika ʼn sieker en ʼn armer land maak. Die feit dat dr. Crisp dink die regering kan sulke skadelike en omstrede wetgewing bloot instel ten spyte van insette, terugvoer en logika is uiters onrusbarend,”sluit Mulder af.
Stem vir die Aitsa’s
