1 Desember 2021
Die vakbond Solidariteit het ʼn nuwe beskermde fluitjieblaasportaal bekendgestel, met die doel om werknemers te bemagtig om korrupsie by Eskom bloot te lê.
Volgens Solidariteit is die meeste werknemers by Eskom goeie mense wat hard werk, maar ʼn kultuur van plundering en korrupsie maak dit vir hulle onmoontlik om hulle werk doeltreffend te doen.
LEES OOK: ONDERSOEK INGESTEL OOR MOONTLIKE “SABOTASIE” BY ESKOM
Volgens die bestuurshoof by Solidariteit, dr. Dirk Hermann, is korrupsie in Eskom geïnstitusionaliseer.
Hy sê interne korrupsienetwerke steel gewone belastingbetalers se krag en daar is ʼn bendenetwerk in Eskom wat hulself verryk terwyl gewone Suid-Afrikaners in die donker sit.
Volgens Hermann is hulle bewus van werknemers wat van hierdie wanpraktyke weet, maar dat die betrokkenes vrees vir hulle loopbane en hulle lewens – en daarom nie met die sak patats vorendag wil kom nie.
“Daar is niks so gevaarlik soos goeie mense wat stilbly nie. Ons mag nie toelaat dat plundering genormaliseer word nie. Ons mag ook nie sê dit help in elk geval nie om plundering aan te meld nie. Die oomblik wat ons dit doen, het ons oorgegee, tot groot vreugde van die boewe,” sê Hermann.
LEES OOK: ESKOM-HOOF MAAK KLAG AANHANGIG OOR DREIGEMENTE OP SOSIALE MEDIA
Hy sê die vakbond sal gereeld terugvoer gee oor die tendense van korrupsie wat aangemeld word op dié platform.
Stem vir die Aitsa’s
