Solidariteit sê hy is van voorneme om druk op owerhede te verskerp sodat Suid-Afrika ’n aktiewe gesprek kan begin oor wannéér en hóé rassewette as sogenaamde regstellende-aksiemaatreël ten einde moet loop.
Die kom nadat ‘n Ipsos-peiling, in opdrag van News24, getoon het dat daar ‘n groeiende behoefte aan die afskaffing van rasreëls is. Die peiling toon onder meer dat net 44% van Suid-Afrikaners nog ten gunste van die behoud van wetgewing oor swart ekonomiese bemagtiging is.
Volgens die peiling glo minder as die helfte van swart Suid-Afrikaners dat SEB moet voortgaan, terwyl die meerderheid wit en bruin Suid-Afrikaners ’n onmiddellike einde daaraan wil sien.
Volgens Connie Mulder, hoof van die Solidariteit Navorsingsinstituut, is dit beslis nie die eerste peiling wat wys dat Suid-Afrikaners nie verder in SEB of ander rassewette belangstel nie.
“Hierdie peiling toon ook dat die grootste behoefte van Suid-Afrikaanse burgers werk en veiligheid is. Rassewetgewing doen niks daaromtrent nie, dit is sleg vir Suid-Afrika se ekonomie en dit is sleg vir Suid-Afrika se bevolking,” meen Mulder.
Mulder sê hierdie Ipsos-peiling strook met dit wat Solidariteit ook sien. Mense oor alle rasse heen soek ’n einde aan rassewette.
Volgens hom moet die ANC ag slaan op die wil van die mense en met gesprekke oor die uitfasering van hierdie beleide begin,” sê Mulder.
