18 Mei 2021
Die vakbond, Solidariteit beteken vandag hofstukke op die minister van menslike nedersettings, water en sanitasie, Lindiwe Sisulu, oor die invoer van Kubaanse ingenieurs.
Die regsproses sluit in die bekendmaking van inligting, ʼn interdik om die ontplooiingsproses te stop, asook ʼn aansoek vir die hersiening van die regering se besluit.
Dié regstappe volg nadat die minister nié by die spertyd gehou het om ʼn voorstel te maak om die dispuut tussen Solidariteit en die regering te ontlont nie.
LEES OOK: SPERTYD RAKENDE KUBAANSE INGENIEURS VERLENG
Solidariteit het ook gesê dat hy met regstappe voortgaan, maar dat verdere gesprekke nie uitgesluit hoef te word nie.
Die bestuurshoof van Solidariteit, dr. Dirk Hermann sê die vakbond is teleurgesteld in die minister, omdat daar ʼn versoek van die regering was om ʼn voorstel aan hul voor te lê en het daarom die aanvanklike spertyd vir só ʼn voorstel twee keer uitgestel.
Hermann sê buiten dat die regering nie by die spertyd gehou het nie, het die minister ook nie ook nie op wesenlike regsvrae wat Solidariteit gestel het, geantwoord nie.
LEES OOK: SOLIDARITEIT GAAN VOORT MET REGSAKSIE OOR KUBAANSE INGENIEURS
Solidariteit begin sy regstappe deur met ʼn proses vir openbaarmaking van inligting te begin. Volgens Hermann moet die geheimhouding rondom die Kubane se koms, wat hulle gaan doen, hoe die geld bestee gaan word en of die Kubaanse ingenieurs geregistreer is, verbreek word.
In die hersieningsaansoek gaan Solidariteit vra om die regering se besluit om die Kubane in te voer ongeldig te verklaar.
Die 24 Kubaanse ingenieurs is vroeër deur minister Sisulu na Suid-Afrika gebring teen ‘n koste van R64-miljoen. Sy het destyds gesê dat geen Suid-Afrikaanse ingenieur in die privaatsektor bereid sal wees om vir drie jaar in ‘n landelike gebied te woon en werk nie.
LEES OOK: SISULU KIES KUBANE BO WIT INGENIEURS
