19 Januarie 2022
Die vakbond, Solidariteit het vandag tydens ʼn mediakonferensie bekendgemaak dat hy hofstukke op die Universiteit van die Vrystaat beteken het in verband met dié universiteit se beleid om studente en werknemers te verplig om die Covid-19-inenting te kry.
Solidariteit het ook tydens die konferensie sy planne aangekondig om verskeie ander hofsake oor die verpligting van inentings in die werkplek aanhanging te maak.
Volgens Solidariteit sal sy eerste saak teen die organisasie vir werkgewers in klein Suid-Afrikaanse ondernemings, SEESA, op 27 Januarie in die arbeidshof in Johannesburg aangehoor word.
Die vakbond se bestuurshoof, dr. Dirk Hermann sê op die oomblik word die Suid-Afrikaanse arbeidsmark gekonfronteer met ʼn geweldige onsekerheid oor of werkgewers hul werknemers, of selfs universiteite hul studente, kan verplig om die inenting te neem.
Hy meen as gevolg hiervan sien hulle hoe tientalle werkgewers hierdie onsekerheid uitbuit en dit as ʼn verskoning gebruik om werknemers af te dank sonder om die regte prosedures te volg.
Volgens Solidariteit sal enige vorm van “kombersbenadering” wat nie die unieke situasie van individuele werknemers of studente in ag neem nie, onwettig maar ook onwenslik wees.
