15 Mei 2024
Solidariteit, die Solidariteit Skoleondersteuningsentrum (SOS) en AfriForum sê hulle gaan hande vat in ʼn regstryd teen die voorgestelde Wysigingswetsontwerp op Basiese Onderwyswette (Bela-wet), indien dit soos verwag word deur president Cyril Ramaphosa onderteken word.
Die organisasies het vanoggend in ‘n gesamentlike mediakonferensie hulle voorneme bekend gemaak nadat die Nasionale Raad van Provinsies (NRP) gister die Bela-wysigingswetsontwerp goedgekeur het.
LEES OOK: NRP SE GOEDKEURING VAN BELA-WET DALK DIE BEGIN VAN ‘N HOFSTRYD
Die Bela-wet sal gevolglik môre in die Nasionale Vergadering goedgekeur word voordat dit vermoedelik ook deur Ramaphosa bekragtig word.
Die bestuurshoof van Solidariteit, dr. Dirk Hermann sê hulle is voorbereid en gereed om hierdie stryd so ver te voer as wat nodig is.
“Dit is jammer dat die verhouding tussen gemeenskappe en die regering in die hof gereguleer moet word. ʼn Hofstryd is nie bevorderlik vir verhoudinge nie. Solidariteit is egter hof-fiks – ons is gereed vir die hofstryd,” sê Hermann.
LEES OOK: BELA-WET: SOLIDARITEIT DIEN PETISIE IN
Hy meen die ANC is angstig om die wetgewing deur te druk voor die verkiesing.
Die uitvoerende hoof van die SOS, Leon Fourie het benadruk dat hulle óók gereed staan met hofstukke, en is van mening dat die Bela-wet Afrikaanse kinders se reg tot moedertaalonderrig sal skend.
Die uitvoerende hoof van AfriForum, Kallie Kriel, het die Bela-wysigingswetsontwerp beskryf as ʼn aggressiewe daad en ‘n aanval op Afrikaanse skole en kinders waarmee die regering beheer oor die skole wil kry.
