Die polisie in Portugal het met ‘n nuwe ondersoek begin naby die plek waar die Britse kleuter, Madeleine McCann in 2007 tydens ‘n familie-vakansie verdwyn het.
Sy het op 3-jarige ouderdom uit die woonstel by die Praia da Luz–oord in die suide van Portugal weggeraak.
Die voorval het ‘n internasionale soektog tot gevolg gehad en daar is wyd oor haar verdwyning berig.
Die laaste soektog na Madeleine is in Mei 2023 gedoen.
Die nuwe soektog sal na verwagting tot Vrydag voortduur en is op aanvraag van die Duitse owerhede wat die veroordeelde verkragter, Christian Breuckner, vir Madeleine se verdwyning ondersoek.
