9 Desember 2021
Die Spesiale Ondersoekeenheid (SOE) het ‘n beroep op Suid-Afrikaners gedoen om ‘n aktiewe rol te speel in die blootlê asook voorkoming van korrupsie.
Die beroep kom te midde van 2021 se Internasionale teen-korrupsie dag, wat vandag herdenk word. Die SOE se woordvoerder, Kaizer Kganyago sê mense kan hulle deel doen deur enige beweerde korrupsie by wetstoepassers aan te meld.
Volgens Kganyago lê korrupsie die ekonomie en staatshulpbronne lam. Openbare onderneming ly ook onder korrupsie. Hy meen deur korrupsie bloot te lê en te voorkom sal die regering toelaat om die publiek se vertroue te wen.
Die SOE sê gedurende die 2020/2021 boekjaar is 1276 bewerings van korrupsie binne staatsdepartemente en munisipaliteite aangemeld. Kganyago sê 410 van die klagtes was rakende die nasionale regering. 258 sake van korrupsie is in die Gautengse regering ondersoek, gevolg deur 128 sake in Limpopo.
Die minister in die presidensie, Mondli Gungubele het vanoggend buite die departement van kommunikasie se kantore in Pretoria gesê dat die mag van fluitjieblasers nie onderskat moet word nie.
