9 Desember 2021
Die Spesiale Ondersoekeenheid (SOE) is sedert Julie vanjaar besig om meer as 2600 regeringskontrakte te ondersoek, wat te make het met die Covid-19-pandemie.
Die ANC-LP en lid van die staande komitee oor openbare rekeninge (Skoor), Bheki Hadebe sê van dié 2600 ondersoeke is glo nog net 1068 afgehandel. Volgens hom het die meeste van die ondersoeke te make met persoonlike beskermde toerusting.
‘n Parlementêre sitting met Skoor, die SOE en die presidensie is gisteraand gehou.
Volgens hom is die komitee bekommerd oor hoe lank dit neem om teen hulle op te tree. Hadebe voer ook onder meer aan dat die regering se houding “om nie betrokke te raak by die sake nie” ent moet kry.
Die SOE het vroeër vandeesweek in ‘n verslag bekend gemaak dat ongeveer R15-miljard se beweerde bedrog, rakende persoonlike beskermde toerusting ondersoek word. Dit is 11% van die totale R139-miljard, wat die regering aan toerusting bestee het.
Hadebe meen president Cyril Ramaphosa behoort nie eers te wag vir die SOE se finale verslag voordat hy optree nie.
