18 Oktober 2022
Die departement van korrektiewe dienste sê hy werk met die polisie saam om sewe verhoorafwagtenes te probeer opspoor wat vanoggend uit die Grahamstad gevangenis by Makhanda ontsnap het.
Al sewe die gevangenes is Zimbabwiërs en staan tereg op aanklag van renosterstropery.
Volgens die departement het hy met ‘n ondersoek begin na hoe die verdagtes uit aanhouding kon ontsnap en het onderneem om die bevindings bekend te maak sodra die ondersoek afgehandel is.
Die departement het ook onderneem om deur die loop van die dag foto’s van die verdagtes beskikbaar te stel aan die publiek, maar het gesê dat die verdagtes nie gekonfronteer moet word nie aangesien hulle gevaarlik is.
