20 Desember 2021
Die ministeriële advieskomitee oor Covid-19 het aanbeveel dat mense hulself nie meer hoef af te sonder wanneer hulle in kontak was met iemand wat positief getoets het vir Covid nie.
Die komitee sê kwarantyn is nie meer ‘n doeltreffende manier om die verspreiding van die virus te keer nie, onder meer omdat slegs ’n handjievol mense, wat in kontak was met iemand wat Covid-19 het, opgespoor word.
Die komitee sê ook dat net 10% van alle gevalle suksesvol geidentifiseer word en dat baie mense a-simptomaties is as hulle die virus opdoen.
Die komitee het ’n skrywe aan die minister van gesondheid, Joe Phaahla, gestuur waarin hulle sê dat ’n groot aantal mense intussen ’n vorm van immuniteit teen Covid-19 opgebou het, hetsy as gevolg van die entstof of deur van die virus te herstel. Hulle sê verder dat hulle nou meer kennis het oor die verspreiding van die virus.
Die Suid-Afrikaanse regering het kort ná die uitbreking van Covid in die land versoek dat enigiemand wat positief toets of in kontak was met die persoon wat die virus onder lede het vir 14 dae in selfafsondering moet gaan wat later tot 10 dae verkort is.
