30 Augustus 2022
Die Inligtingsreguleerder eis antwoorde by die Suid-Afrikaanse Polisiediens (SAPD) oor hoe die persoonlike inligting van die Krugersdorp-verkragtingslagoffers uitgelek het.
Die reguleerder het ‘n dagvaarding aan die SAPD bedien om antwoorde te verskaf oor die voorval.
Die agt vroue was in Julie besig met die verfilming van ‘n musiekvideo toe hulle deur ‘n bende mans verkrag is. Volgens die reguleerder se woordvoerder, Nomzamo Zondi het die slagoffers se name, ouderdomme, huisadresse en die omvang van hulle beserings aan die lig gekom.
Volgens Zondi is die inligting na bewering deur polisiebeamptes op WhatsApp aangestuur. Sy meen dit is onaanvaarbaar dat persoonlike inligting uitlek.
