1 Junie 2021
Motoriste word gemaan om vandag die middestad van Pretoria te vermy te midde van ‘n betoging deur lede van die Suid-Afrikaanse Munisipale-werkersvakbond, SAMWU.
Optoggangers trotseer die gure weer om hulle griewe oor verskeie sake aan die lig te bring, waarvan die belangrikste waarskynlik hulle vrees is dat daar nie vanjaar salarisaanpassings sal wees nie.
SAMWU dring aan op ‘n R 4000 salarisaanpassing vir alle lede. Vrese het ontstaan nadat die Tshwane-bugemeester, Randall Williams, verlede week gesê het dat die Tshwane-metro tegnies finansieël bankrot is.
Die betogers kom by die ou Putco-depot bymekaar en sal van daar af die middestad se strate invaar.
Hulle beplan om by verskeie punte, waaronder die nasionale tesourie en stadsraadskantore, aan te doen – waar verskeie memorandums oorhandig sal word.
