7 Augustus 2023
Die Organisasie teen Belastingmisbruik (OUTA) het ‘n strafregtelike klag teen die Nasionale Studente Finansiële Hulpskema, NSFAS se uitvoerende hoof, Andile Nongogo, ingedien.
Nongogo was die voormalige hoof van die Onderwys en Opleidingsowerheid vir die Dienstesektor, oftewel, die SSeta.
Volgens OUTA het Nongogo tenders goedgekeur aan die maatskappy Five Star, om die Dienste Seta se handelsmerk te vernuwe. Die totale koste van die tender, wat in 2016 toegeken is, het nagenoeg R40-miljoen beloop.
Nongogo het betalings goedgekeur waarvolgens die Dienste Seta meer as R44 000 vir ‘n sambreel betaal het, en meer as R4 500 vir ‘n T-hemp. OUTA het ook ‘n klag teen hom by die Suid-Afrikaanse Instituut vir Geoktrooieerde Rekenmeesters ingedien.
Volgens fakture in OUTA se besit is meer as R264 000 betaal vir ses sambrele, R93 000 vir 20 T-hemde, R36 300 vir die ontwerp van ‘n briefhoof en R58 400 vir fotografie-dienste vir een dag.
Foto: The Citizen
