25 Januarie 2023
‘n Sakeman van Kaapstad het gister op verskeie klagte van aanranding in die Bellville-landdroshof in Kaapstad verskyn.
Dít kom nadat ‘n video aan die lig gekom het waar daar gesien kan word hoe dié man sy vrou in hul bed slaan en verwurg terwyl hul dogter haar ma probeer beskerm.
AfriForum se privaatvervolgingseenheid tree namens die ma en kind op.
Volgens die privaatvervolgingseenheid se kommunikasiebestuurder, Barry Bateman het die kliënt in 2018 reeds ‘n saak van aanranding teen haar man geopen. Die saak is kort daarna egter teruggetrek nadat daar bevind is dat die ma en dogter emosioneel ongeskik is om te getuig.
Die man se identiteit word weerhou omdat sy dogter, wat sentraal in die saak is, ‘n minderjarige is. Dié voorval sal saam met ander kringtelevisie-beeldmateriaal gebruik word as deel van die getuienis teen die beskuldigde.
Die saak is tot 16 Februarie 2023 uitgestel.
